AAMIR KHAN SE BAATCHEET
The language of the post is Non-English.. only the script is in english. sorry for them,who cant read and understand it.
for reading in hindi log on to…http://chavannichap.blogspot.com
(YAH BAATCHEET GHAJINI KEE RELEASE KE PAHLE KEE GAYI THI)
apni nayi film ghajini ke bare mein aamir khan kahate hain ki yah action thriller film hai, jo audience ko bilkul alag tarah ka anubhav degi. aamir kahate hain ki audience ko meri filmon ko lekar khas jigyasha rahti hai,isliye unhen hamari film se ummid bhi adhik rahti hai. aamir ne ghajini sahit apne filmi jeevan aur nayi yojanaon par khulakar udgar vyakt kiye.
-kaha ja raha hai ki aamir khan ne ‘ghajini’ ke prachar men baji mar li hai. yah kitana sachet prayas hai?
-jahan tak baji marane ki baat hai to usake liye film release hone dijiye. han, hype zaroor hai. woh shayad isliye hai ki meri filmen sal men ek dafa aati hain to logon ki jigyasha rahti hai. mere mamle mein audeience ki ummeed har film ke sath badhati ja rahi hai. pichhali film unhen achchhi lagati hai to ve agali film se aur jyada ummeed karate hain. ‘ghajini’ se jyada ummeed isaliye hai ki main lanbe vaqt ke baad poori tarah se entertainer film kar raha hoon. mere liye ‘ghajini’ ka anubhav alag raha hai. darshak bhi maan rahe hain ki unke liye ‘ghajini’ dekhana alag anubhav hoga. audience ne lanbe samay se koi action thrillerr nahin dekha hai. mujhe lagata hai ki poora hype in sari sthitiyon ka mila-jula asar hai. iski marketting zaroor alag dhang se kee ja rahi hai, kyonki ismein sanbhavanayen bahut hain. ‘taare zamin par’ chhoti film thi to usaki marketting alag dhang se ki gayi. main hamesha manata hoon ki jis tarah kee film hai, hamesha usi anupat men sachchaee se marketting karani chahiye.
-aisa kaha gaya ki aamir khan ne salman khan se dosti nibhayi aur shahrukh khan ki film ke samay apani film ka prachar jhonk diya. kya kisi ko harane ka man rahta hai?
-kisi ko harane mein meri koi ruchi nahin hai. main kabhi nahin chahoonga ki kisi ka bura ho. hamari soch men aisi baat nahin hai, isliye kisi ka bura nahin hoga. hamari vajah se kisi ka nukasan nahin hoga. multiplex ke staffs ne ‘ghajini’ ka look apanaya. jo bhi darshak ‘rab ne bana di jodi’ dekhane gaya, use ‘ghajini’ ke look mein staffs dikhe. ticket kharidane se lekar seat par baithane, popcorn kharidane aur bahar nikalane tak ‘ghajini’ look ke staffs dikhe. isase ‘rab ne bana di jodi’ ke darshak kam nahin huye. aisa to nahin huaa ki ve theatres mein ‘ghajini’ ke look mein staffs ko dekh kar laut gaye. hamesha chal rahi film ke saath aane vali film ki publicity kee jati hai. darshak ‘yuvaraj’ dekhane gaye honge to ‘rab ne bana di jodi’ ka trailor dikha hoga. meri film aayegi to ‘chandani chowk to china’ ka trailor dikhega. theatre mein trailor, bahar men poster dikhenge prachar ka yah traditional tarika hai. hamne ek naya roop diya ki aap aayenge to aapako ‘ghajini’ ke look men staffs dikhenge. har film ke saath aisa prachar nahin ho sakata. ‘ghajini’ ka ek khas strong look hai, jo bahut pahale se darshakon ke bich lokapriya hai. theatre ke staffs ko ‘ghajini’ ka look dena trailor dikhane jaisa hi hai. is samay ‘rab ne bana di jodi’ ke bajay koi aur film hoti to bhi ham yahi karate. hamari koshish yah nahin ki kisi ko nukasan pahunchayen. ham apana prachar kar rahe hain. hamari sari koshish apni film ke maddenazar hai. ham nahin chahenge ki hamari publicity se kisi ka nukasan ho jaye.
-kya kisi staff ne ‘ghajini’ luk rakhane se inkar kiya?
-meri jankari mein aisi koi soochana nahin aayi hai. yah thopa nahin gaya hai. ise thopa nahin ja sakata aur na main chahoonga ki thopa jaye. main svayam kuchh theatres mein gaya tha. ve bahut khush aur utsaahit dikhe. agar koyi ‘ghajini’ look nahin rakhana chahe to thik hai. meri nazar men aisa koyi mamala nahin aaya. main isamen sidhe taur par shamil nahin hoon. fir bhi agar kahin kuchh huaa hota to meri team mujhe batati. aisa prachar logon ki khushi aur sahabhagita se hi hota hai. theatre ke manager aisa prachar karate rahate hain. ve popcorn ke dabbe ya aur cheejon par aagami film ki tasveeren lagate hain. yah naya idea tha. thetre mein to ham logon ne kiya, lekin public to bahut pahale se ‘ghajini’ look mein ghoom rahi hai. theatre ke manager ‘ghajini’ ko event film ke taur par dekh rahe hain. isi karan ve josh men bahut kuchh kar rahe hain.
-pichhale chhah-saat salon men aap ne jaisi filmen ki hain, ghajini unase bilkul alag samajhi ja rahi hai. yah kis roop men alag hai?
-sabase pahle to yah meri pahali action thriller film hai. maine pahle bhi kaha ki lambe vaqt ke bad entertainer film kar raha hoon. tisari vajah yah hai ki lambe samay ke baad action film aa rahi hai. idhar aapne action films nahin dekhi hogi. aajkal comedy jyada ban rahi hai aur kuchh romantic films aa jati hain. action films band hain. bahut salon se logon ne pure action film nahin dekhi hai.
-poora desh mumbaa hamle ke bad nirasha aur hatasha ke daur se gujar raha hai. is mahaul men badale ki bhavana par aadharit aakramak action film ‘ghajini’ se darshakon ko rahat mil sakati hai. kuchh logon ka manana hai ki isase ‘ghajini’ ko fayada hoga. aap kya sochate hain?
-hamane aisi koi planning nahin ki thi. aise hadason ke bare men soch bhi nahin sakate. ham do salon se is film mein lage the. mumbai ka hadasa bahut dardanak hai. aise aatanki hamale pahale bhi huye hain. banaras men huaa, mumbai ke local trains mein bomb dhamake huye aur bhi jagahon par huye. is bar ka manzar alag hai. pahle bomb rakhakar aatanki chhip jate the. ab ve khuleaam chunauti de rahe hain. yah bahut hi khataranak hadasa hai. ham sabhi isase dukhi hain. main ekadam nirasha men chala gaya tha. hamne itne josh aur ruchi se film banayi thi, lekin taza mahaul mein kuchh kahane ya karane ka man nahin ho raha tha. is khataranak hadase se hamen darane ki nahin, joojhane ki zaroorat hai. yah hamen prabhavit to kare, lekin vaise nahin jaise ki ve chahate hain. yah hamen prabhavit kare ki ham sahi tarike apanayen. ham nirash hokar ummeed na chhoden. hamari film badale ke bare men hai. aaj logon men narazagi hai, gussa hai, ek aag hai, badale ki bhavana aur aakrosh hai sanyog se aise samay men ‘ghajini’ aa rahi hai. is sanyog se mujhe khushi nahin ho sakati hai ki film ki bhavana se unaka emotion jude, lekin mujhe dard hai ki yah hadasa huaa.
-yah aapaki pahali remake film hogi. kaisi savadhani baratani padi ya chunautiyan rahin?
-maine mool film mein kaam nahin kiya hai, isliye remake film bhi mere liye taza anubhav hai. kisi doosari nayi film karane jaisa hi josh hai, kyonki mere liye yah nayi film hi hai. meri taraf se yah savadhani rahi ki mool film ke hero Surya ki naqal na karoon. Surya ne bahut achchha kam kiya hai, lekin yah meri prastuti hai. saman sthitiyon men main kaise apane emotions vyakt karata hoon,maine us par dhyan diya hai. director ke liye jyada mushkil rahi hogi, kyonki vah ise ek dafa bana chuke hain. ab vahi cheej woh dobara bana rahe hain. agar koyi mujhse kahe ki ‘tare zamin par’ dobara banao to mera javab hoga ki jo emotions the, unhen main jahir kar chuka hoon. ab dobara kya karoon? director ko khud ko recharge karana tha. use pahle ki tarah hi josh banaye rakhana tha. murugadoss ne yah kam bakhoobi kiya hai. unmein bachchon jaisa josh hai. chaudah sal ke bachche ka kautoohal hai unmein. unmein gajab ki oorja hai.
-mool film se kya chijen badali gayi hain?
-film ke aakhiri 30 minutes taza hain. ve mool ki tarah nahin hain. yah ek bada badalav hai.
-aapke bookshelf par philospher Nitse kee char kitaben hain? koyi khas lagav hai kya unake lekhan aur darshan se?
-mere khyal men ve rochak vyakti the. unaki baton men navinata hai. maine ek kitab padhi thi-when Nitse wept, jo kisi aur ne unki zindagi ke bare men likhi hai. ek dr. Bruer the, jo fryd ke senior the. yah kitab bruer aur nitse ki batachit par aadharit kalpanik kitab hai. donon kabhi mile nahin the. lekhak ne donon ki zindagi par research kar yah kitab likhi thi. vah kitab mujhe bahut hi achchhi lagi thi. usake bad nitse mein meri ruchi jagi. maine unhen padha ki ve kaise darshanik hain?
-kya unake darshan se aap prabhavit huye?
-unhonne kafi radical baten ki hain. main unaki sari avadharanaon se sahamat nahin hoon. lekin unhen padhana achchha lagata hai.
-aap khud badale ki bhavana men yakin rakhate hain kya?
-main ahinsak vyakti hoon. hinsa men mera yakin nahin hai. badale ki bhavana ka ham apani zindagi men anubhav karate hain. alag-alag vaqt par aisa lagata hai ki yara, is aadami ne itna galat kiya hai. iska hamen badala lena hai. zaroori nahin hai ki uski jaan hi len. man mein use dukh pahunchane ki bhavana ho sakati hai. ham sabhi is bhavana se aaveshit hote hain. kayi bar yah uchit bhi hota hai. main vyaktigat taur par badale men yakin nahin rakhata.
-kahate hain ekting apane anubhavon ko jina hai. fir mool roop se ahinsak hone par ‘gajani’ jaisi film kaise kar paye aapa?
-yahi to chunauti hai. actor ko kuchh aisa karane ko mile, jismen vah vyaktigat taur par yakin nahin karata to vah badi chunauti hoti hai. main real life mein badale men yakin nahin karata, lekin aisi bhoomika kaise nibhaoonga? vah ek alag chunauti hai. ‘ghajini’ ki bat karen to usaki zindagi men ek badi ceej hui aur usake baad uska dimag badale ke raste par nikal pada. agar meri zindagi men kahin aisa ho gaya to maloom nahin kaise react karoonga ya aap kaise react karenge? agar itna bada hadasa hamari zindagi mein ho to ham sachchaee se nahin kah payenge ki kya karenge? kya hamare andar bhi badale ki bhavana jagegi?
-kaha ja raha hai ki aamir khan media premi ho gaye hain. isase kitana fayada huaa hai?
-isase mujhe bhavanatmak fayada huaa hai. jab mainne tay kiya tha ki midiya se bat nahin karoonga, tab main pareshan tha aur midiya se bat nahin kar raha tha. meri vyaktigat pareshaniyan thin. un dinon midiya men 90 pratishat mere khilaf hi likha ya bataya ja raha tha. yah soch kar ki yah khud ko samajhata kya hai? meri taraf se aisa kuchh bhi nahin tha, lekin kahin ek gap tha. tab meri safalataon ko kam aur asafalataon ko bada kar ke bataya jata tha. safalata-asafalata se pare mere bare men kuchh n kuchh bura hi rahata tha. negativ baten hoti thin. maine apni taraf se koshish ki aur ise sudhara. abhi 80 pratishat kami aa gayi hai. ek sukoon milata hai. main sakaratmak insan hoon. mujhe nigetiv chijen nahin leni hai. main dil men kyon nigetiv baten rakhoon. aur kyoon main negativ bhavanayen paloon.
-kahate bhi hain ki nafarat nibhana jyada mushkil kam hai. mohabbat men to sirf muskarana padata hai
<>bilkul sahi kaha hai. nafarat mere svabhav men nahin hai. pahale main chup rahata tha aur mujhe midiya ke dande padate the. abhi baten karata hoon to dande kam ho gaye hain.
mool ‘ghajini’ dekhane par poori film thodi crude aur hinsak lagati hai?
-main tamil ke darshakon ke bare men nahin janata. main apne darshakon ke bare men janata hoon. unke liye main 20 salon se filmen bana raha hoon. meri koshish rahi hai ki hindi ki ‘ghajini’ hindi darshakon ki soch-samajh ke sath chale. cameraman ravi chandran hain. ve hindi filmon ke mashahoor cameraman hain. rahaman ke bare men sabhi janate hain. is film se jude sabhi kalakar aur technicians mool roop se hindi cinema ki samajh rakhane vale hain. mujhe lagata hai ki uska asar hoga film para.
-romantik geet men aapaki 8 pack abs dikhaee gaee hai. romanc to bahut naram khyal hai. usmen sharir saushthav dikhane ki kya jaroorat thi?
<>is film ke liye mainne bandi banaee thi. film ke kaimaramaina, director aur choreographer ahmad khan ko meri bandi pasand aaee. unhonne kaha ki are yar button kholo. to ek-yek kar ke sare buttons khul gaye. aisa nahin socha gaya tha ki gane ke liye bandi banani hai aur use dikhaya hai.
kya aapako unake sujhav sahi lage?
-haan, mujhe koyi dikkat nahin thi. ‘bahaka’ aur ‘guzarish’ gane par jo pratikriyayen mil rahi hain, unase lagata hai ki logon ko achchha lag raha hai. mujhe is roop men dekh kar logon ko achchha lag raha hai.
asin ko rakhane ki sabase badi bat kya rahi?
-asin ne mool mein adbhut kaam kiya hai. mera ek hi saval tha ki asin ko hindi aani chahiye. hamne pata kiya to maloom huaa ki unki hindi achchhi hai. is film ki shooting sink sound men huee hai. koyi bhi samvad dub nahin kiya gaya hai. unke uchcharan men dakshin ka lahaja nahin hai.
nirdeshak murugados ko jimmedari dene ki vajah kya rahi?
-maine yah film unki vajah se hi ki. maine ‘ghajini’ dekhi to mujhe pasand aayi thi. shuroo mein main nishchit tha, lekin director se milne ke bad maine tay kiya ki film karoonga. usaki do vajahen hain. ek to director jab mujhase milne aaye to unhonne kaha ki hindi remake mein ant ka aadha ghanta sudharana aur badalana hai. unki yah bat janchi, kyonki main svayam vaise hi soch raha tha. unse sunkar laga ki ham donon ek hi tarah se soch rahe hain. doosari chij unki energy thi. unamen bachchon jaisi oorja hai. unaki aankhon men chamak hai. mujhe laga ki yah banda kuchh alag hai. mujhe inake sath kam karana chahiye.
ab to aap ghoshit roop se nirdeshak ban gaye hain. ek dharana hai ki aamir khan nirdeshak ke kam men kafi hastakshep karate hain?
-ismein sachchayi nahin hai. han, nirdeshak ki apni samajh se main nirdeshak ko ek hi scene do-tin tarike se kar ke bata sakata hoon. batata bhi hoon. agar meri kabiliyat jyada hai to usase director ko madad hi milati hai. is tarah main apne kiradar ko vibhinn staron aur oonchaiyon par le ja sakata hoon. lekhak ki likhi kahani ko nirdeshak kisi aur leval par le jata hai. usi prakar director ki soch ko ektar badha sakata hai. ‘tare zameen par’ karate samay main drishya ke baare mein ek dhang se sochata tha. lekin darshil use meri ummid se behatar kar deta tha. usaki chhalang se mujhe khushi hoti thi. maine idhar jitane bhi nirdeshakon ke sath kam kiya chahe ve murugadoss hon, farhan akhtar, rakesh mehra, john mathew ya ashutosh hon sabhi ke sath mere anubhav bahut achchhe rahe.
kya aapane yah film kuchh alag karane ya kriyetiv svad badalane ki garaj se ki?
-main sirf alag karane ki garaj se koyi film nahin karata. film ki kahani mein main apna excitement dekhata hoon. svabhavik taur par main alag hi chij sunata hoon. koyi ek film kar chuka hoon to vaise vishay ki film ke bare men nahin sochata. main alag chij khojata nahin hoon. mujhe alag chij aakarshit karati hai. yah film maine isaliye kee ki iski kahani, bhavana aur prastuti pasand aayi. iski patakatha jabaradast hai. director to pasand the hi.
aapaki patni kiran rao ki film ‘dhobighat’ ki kya sthiti hai?
-use kiran svayam produc kar rahi hain. unhonne isaka lekhana, nirdeshan aur nirman kiya hai. unake jivanasathi hone ki vajah se main unhen har prakar ka sahayog dena chahata hoon. aamir khan production ise prastut kar raha hai. takniki roop se main nirmata nahin hoon. ‘dhobi ghat’ sambandhon ki kahani hai. mumbai ke bare mein hai. is shahar ki zindagi isamen milegi. usake alag pahalu hain. char zindagiyan ek mod par aakar judati hain.
aamir khan prodakshan men kya naya ho raha hai?
-hamalog ‘delhi bellyi’ bana rahe hain. usake alava ek aur film anusha rizavi ki hai. ‘delhi belly’ english mein bani comedy film hogi. anusha ki film gramin bharat ki kahani hai. kisi ne galat likh diya ki vah kisanon ki aatmahatya par hai. film aaj ke gaon ki kahani hai. gaon ki zindagi, sthaniya adminstration, sthaniya rajniti aur us rajniti ka rashtriya rajaniti se sanbandh aur midiya in sabhi ko milakar anusha ne ek vyangy likha hai, lekin yah vastav men gramin bharat ki kahani hai. main donon men ekt nahin kar raha hoon.
aapaki umr badh rahi hai. kya kabhi yah khyal aaya ki apane bare men naye sire se sochen?
-meri koshish hai ki main javan dikhoon. umra to badhegi hi. umra ke sath energy leval badalati jati hai. javani mein anubhav kam hota hai. abhi meri umra 43 hai aur mujhe 20 salon ka anubhav hai. meri energy abhi tak pahle jaisi hai. usmein kami nahin aayi hai. role ki bat karoon to maine hamesha alag-alag kism ke role ki chunauti sveekar ki hai. umr mere liye badha nahin hai. agar mujhe assi sal ke vyakti ki bhoomika mile to main vah karana chahoonga. rol aur dayarektar pasand aane ke bad agar mujhe lagega ki main us kiradar ko nibha paoonga, tabhi ha kahoonga. mujhe santoshi ne ‘bhagat singh’ offer ki thi. mujhe laga tha ki main use nahin kar sakata. bhagat singh ki sachchayi thi ki ve 18 sasl ke lagen. ek ladaka jo 21 saal ki umra mein fansee chadh jata hai, vah 18 saal ki umr men kaisa raha hoga? usaki bat ka alag vajan hoga. bhagat singh aitihasik kiradar the aur us kirdar ka ek bada factor unki umr thi. us umr men ve vaisi baten kar rahe the aur balidan ke liye taiyar the. actor ke taur par main bhagat singh ka kiradar kar sakata hoon, lekin unaki umr ko main sachchayi se parde par nahin la sakata tha.
is sthiti ke bare men kya kahenge ki hindi filmon men hiro ki screen age lanbi hoti hai. lekin hiroins ki umr kam hoti hai?
-yah ham tay nahin karate. yah darshakon ki pasand par nirbhar karata hai. agar darshak kisi kalakar ko pasand karate hain to vah actor ho ki ektres director aur producer use kam denge. darshakon ki ruchi kam ho jayegi to actor ko kam milna band ho jayega. han,lekin aapaki bat sach hai ki heroins ki parde par umr kam hoti hai.
hindi film industry ki vartaman sthiti ke bare men kya kahenge?
-film business hamesha realistic hona chahiye. sahi aankadon ka istemal hona chahiye. jo prastav ya yojana vyavaharik nahin hai, uske khvab dekhane se nukasan hi hoga. meri soch hamesha yahi rahi hai. main manta hoon ki agar koyi nirmata mujh se kamata nahin to meiri jimmedari poori nahin hoti. mere liye yah garv ki baat hai ki mera nirmata mujh se kamata hai. mera vitarak mujh se kamata hai. pradarshak kamata hai. main ise bahut mahatv deta hoon. jeevan ka mera yah siddhant hai ki agar main kisi chij se judata hoon to jo log mujhe jod rahe hain, unhen santushti milani chahiye. unhen santushti tabhi milegi, jab unhen labh hoga. film industry mein jo koyi bhi mere sath kam kare, vah fayade men rahe. main yahi chahata hoon aur usaki koshish karata hoon.
chhoti filmon ki safalata ke bare men kya kahenge?
-mujhe lagata hai ki yah bahut hi achchhi bat hai. alag-alag vishayon par filmein ban rahi hain. isase hamare darshak badhenge. hamara cinema aur jyada sehatamand hoga. badi filmen to banati rahengi. filmein vahi chalati hain, jo sahi banati hain aur achchhi chalati hai. fir vah badi ho ya chhoti. abhi ‘tare zameen par’ ko kya bolenge? ek tarah se vah chhoti film thi. kyonki bade paimane par nahin bani thi. lekin safalata ki bat karen to vah badi safal rahi. use chhoti ya badi film kahenge? main ab kah sakata hoon ki vah badi film hai, kyonki vaisi safalata shayad hi kisi aur ko mili hogi. sirf kamaee ke lihaj se se hi nahin, sarahana ke lihaj se bhi. mere liye film chhoti ya badi nahin hoti. mere liye jaroori hai ki aap kya kah rahe hain. film ka budget uski zaroorat ke hisab se hona chahiye. kya vah jaroorat vyavaharik hai? har film ka apana arthashastra hota hai.
chhoti film ka matalab hai-nann stara, aparanparik vishaya, simit bajat aur nayi shaili
-ji, main samajh raha hoon. main vaisi filmein produce kar raha hoon. main khud chhota nirmata hoon. meri donon filmen chhoti aur samanya hai. ‘delhi belly’ english men hai. englishi men banane se darshak vaise hi ghat jate hain. anusha ki film gramin bharat par hai. usmen nacha, gana, action, romance,thrill nahin hai. vah mudde par aadharit film hai. bharat men aisi film aapane nahin dekhi hogi. main svayam vaisi filmen bana raha hoon. main unmein abhinay nahin kar raha hoon. mujhe lagata hai ki anusha ki kahani pasand hai to us par film banani chahiye. ab us par thik budget mein film bane aur sabhi ko labh ho.
lekin kya aamir khan kisi chhoti film ka hissa ho sakate hain? unake aate hi film badi ho jati hai. isamen unaki fee shamil ho jati hai.
-kyon nahin ban sakati? ho sakata hai ki us film ke liye main apani fis hi n loon.
-multiplex sanskrti ki vajah se bharat ke chhote shaharon ki taraf nirmata dhyan nahin de rahe hain. kya fir se aisi film ban sakati hai, jo poore bharat men ek si pasand ki jaye.
-iske kaee karan hain. gramin aur shahari bharat ka farq sirf entertainment mein nahin rah gaya hai. har pahaloo men nazar aa raha hai. yah achchhi bat nahin hai. doosari chij hindi pradeshon se sahi collection nahin aata. vahan itani chori hoti hai. aisi sthiti men producers sochata hai ki kyon apana vaqt barbad karen. bihar se hamen sahi aankada nahin milta to main kyon paravah karoon. kuchh had tak theaters ke malik aur vahan ke vitarakon ki jimmedari hai. ve vahan activ hain. ve jimmedari nibha sakate hain. mumbai ke prodcer ko return nahin milega to vah film nahin banayega. film ka bazar ya koyi bhi bazar labh ki sharto par chalata hai. agar metro aur multiplex se fayada dikh raha hai to vahan ki filmen ban rahi hai. halanki main svayam bazar ke niyamon ka palan nahin karata, lekin men akela hoon. main apni soch aur bhavanaon se chalata hoon. apni soch ke bavajood main nirmata ko galat nahin kah sakata. kyonki jo paise laga raha hai, use paise vapas chahiye. bazar ko badalana zaroori hai. chhote shaharon se aamdani dikhe to badalav aayega.
aisa lag raha hai ki ‘ghajini’ shahar-dehat ke darshakon ko saman roop se pasand aayegi?
-bilkul. lambe arase ke bad aisi film aa rahi hai. jise ham sahi mayane men universal entertainer kah sakate hain. isamen sambhavana hai. ‘ghajini’ a, b aur c sabhi shreniyon ke darshakon ko pasand aayegi. ‘ghajini’ darshakon ki zaroorat poori karegi.
darshakon ka profile bhi badala hai. pahale mukhy roop se madhyavarg hi cinema ka darshak tha. ab yah multiplex ke jariye uchchavarg ki chij hoti ja rahi hai?
-shayad aap sahi kah rahe hain.
kya aap manenge ki cinema samaj ka aayina hai aur use yah jimmedari nibhani chahiye?
-filmon ka mukhy uddeshya darshakon ka manoranjan karana hai. aksar cinema men samaj ka pratibinb dikhaee padata hai, lekin yah unaka uttaradayitv nahin hai. kaisi bhi film banakar main darshakon ka manoranjan kar sakata hoon. kuchh filmen samaj ko dikhati hain aur kuchh filmen sirf manoranjan karati hain. donon tarah ki filmen banati rahi hain aur aage bhi banati rahengi. yah filmakar aur actor ki pasand par nirbhar karata hai. mainne apane dhang se filmen chunin. koyi aur kisi aur dhang se chunega. har creative insan alag hota hai.
kya acting khud ke liye hi karani chahiye. kahate hain aam upayog ke madhyamon men apani pasand nahin thopani chahiye.
-aapki baat men ek had tak vah sachchayi hai ki hamen kuchh bhi thopana nahin chahiye. main alag tarah se kahoon to cinema hamare sapanon ko santusht karata hai. yah hamare sapanon ki abhivyakti hai. jo chij hamen apani niji zindagi men nahin milati, use parde par dekh kar ham prabhavit hote hain. hamari ruchi banati hai. man lijiye ki main ek aise parivar se hoon, jahan ham sabhi ek sath nahin rahate. bharat ke shaharon men sanyukt parivar bikhar chuka hai. lihaja ‘hum aapake hain kaun’ aati hai to supar-dupar hit hoti hai. vah isaliye hit nahin hoti ki hindustani family vaisi hi hai. ‘hum aapake hain kaun’ men hamari ichchhayen poori hoti hain. superman ko dekh kar maja aata hai. jo chijen hamari jindagi men nahin hoti hain, unhen parde par pakar ham khush hote hain. use ji lete hain.
Anurag Kashyap
Abhay Deol
Dibakar Banerjee
Hansal Mehta
Khalid Mohamed
Kundan Shah
Anish Kuruvilla
Jaideep Verma
Manish Gupta
Navdeep Singh
Bhavani Iyer
D. Santosh
Onir
Ashvin Kumar
Ramu Ramanathan
Sudhir Mishra
Pankaj Advani
Revathy
Saurabh Shukla
Shilpa Shukla
Sujoy Ghosh
Suparn Verma
Santosh Sivan
Shashank Ghosh
Shivajee
Pavan Kaul
Partho Sen-Gupta
Prroshant Naryannan
Sam Langoria
Satish Kasetty
Nice interview. Thanks for posting.
Achchi characha thi yeh,
kaafi Vistrut swaroop me thi.
ASSALAM-U-ALAIKUM,
aap ki film main kuch bhi naya nahi tha wahi purani story larki margy larka badla lene khara hogya nonsense woh wakt gya jab koi larka kisi larki klye yeh sab kare kuch naya banao yaara
ajay sir,
acha interview tha aur hindi main padh kar aur acha laga, aapse ek darkhwast hai ki agar hum kuch shabdo ko unki mool-bhasha(lipi) main hi rehne de toh behtar hai, jaise ki “skrin ej” ki jagah “screen age”, aur “suparamain” ki jagah “superman”, yeh padhen main bhi aasan hai aur shayad rojmarra ki hindi ke jyada kareeb bhi..,
umeed hai ki aapke aise umda posts padhne ko milte rahenge,
abhishek,
sanket ke liye shukriya.sudhar kar diya hai.meri bhoolen thin.
kick,
thanks
shekhar shimpi,
thanks
hi sir,
it’s been a treat to read such an exhaustive interview with free flowing quality.hope you continue your endeavors and keep putting up such lucid and cogent interviews.every question was well researched and well intentioned.this interview is a model on how interviews ought to taken.a pleasant and refreshing read.the interview was also special in another aspect that Aamir is considered HATKE and interview also is very HATKE from usual MASALA INTERVIEWS.