dev d:aatmalipt yuvak kee patangatha
The language of the post is Non-English.. only the script is in english. sorry for them,who cant read and understand it.
for reading in hindi log on to…http://chavannichap.blogspot.com
6 march ko dev d ko release hue mahina ho jayega.film industry aur industry ke bahar logon ko tajjub ho raha hai ki aisa kaise ho gaya.unhen yah ek chamatkaar hi lag raha hai.film mahine bhar ke baad bhi theatres mein tiki hui hai.kyon aur kaise?is par pandit bahas aur vimarsh karte rahenge.anurag kashyap ne dev d se jo hasil kiya hai,woh unke generations ke filmmakers ke liye bahut hi utsahjanak hai.ek umeed majboot hui hai.dev d ke baare main maine yah sab mahina bhar pahle likha tha,lekin mujhe aaj bhi upyogi lag raha hai.
ghise-pite formula aur rang-dhang men ek jaisi lagane vali hindi filmon se ukata chuke darshakon ko dev d rahat de sakati hai. hindi filmon men shilp aur sajavat men aa chuke badalav ka saboot hai dev d. yah film aanand aur rasasvadan ki paramparik prakriya ko jhakajhorati hai. kuchh chhaviyan, drshyabandh aur charitron ki pratikriyayen chaunka bhi sakati hain. anurag kashyap ne bahana sharat chandra chattopadhyay ke devadas ka liya hai, lekin unaki film ke kiradar aaj ke hain. ham aise kiradaron se aparichit nahin hain, lekin dikhavati samaj men satah se ek parat niche ji rahe in kiradaron ke bare men ham baten nahin karate. choonki ye aadarsh nahin ho sakate, isaliye ham inki charcha nahin karate. anurag kashyap ki film men dev, paro, chanda aur chunni ke roop men ve hamen dikhate hain.
dev d ka dhancha devadas ka hi hai. bachapan ki dosti bade hone par prem men badalati hai. ek galatafahami se dev aur paro ke raste alag hote hain. ahankari aur aatmakendrit dev bardasht nahin kar pata ki paro use yon apane jivan se dhakel degi. dev sharab, nasha, drugs, sex worker aur dalal ke sansarg men aata hai. vah chain ki talash men bechain hai. usaki mulakat chanda se hoti hai to use thoda sukoon milata hai. use lagata hai ki koee usaki paravah karata hai. chanda bhi mahasoos karati hai ki dev khud ke alava kisi aur se prem nahin karata. dev amir parivar ka bigadail beta hai, jo bhavanatmak asuraksha ke karan bhatakata huaa patan ke gart men pahunchata hai. yahi karan hai ki usaki bebasi aur lacharagi sahanubhooti nahin paida karati. usake jivan men aaye paro, chanda aur rasika real, smart aur aadhunik hain. ve bhi usaki haqiqat samajhate hain aur daya nahin dikhate. dev d ka dev kamajor, asurakshit, bhavuk, aatmalipt aur anishchit vyakti hai. bahri paristhitiyon se jyada vah khud ke anishchay aur bhatakav ka shikar hai.
anurag kashyap ne dev d men chanda ki prshthabhoomi ki khoj ki hai. sex worker banane ki vivashata ki kahani marmik hai. anajane men mms kand men fans gaee leni parivar aur samaj se bahishkrt hone ke bad vah chunni ki madad se delhi ke pahadaganj men sharan pati hai aur apana nam chandramukhi rakhati hai. kulta samajhi gaee chanda manati hai ki samaj ka adhik hissa kutsit or gandi chijen dekhane men ras leta hai. jis samaj ne use bahishkrt kiya, usi samaj ne usake mms ko dekha. dev d ki paro sahasi, aadhunik aur vyavaharik hai. dev se alag hone ke bad vah bisoorati nahin. dobara milane par vah dev ko apani antarangata se trpt karati hai, lekin dev ke prati vah kisi kism ki bhavukata nahin dikhati. vah apane parivar men rach-bas chuki hai. is film ko nirdeshit karate samay anurag ke manas men purani devadas mandarati rahi hai. leni to apana nam chandramukhi devdas ki madhuri dikshit ke karan rakhati hai. dev d men chitrit prema, sex, rishte aur bhavanaon ko aaj ke sandarbh men hi samajha ja sakata hai. dev d ek prasthan hai, jo prem ke paramparik chitran ke bajaye 21st century ke shahari aur samrddh bharat ke yuva varg ke badalate premabodh ko prastut karati hai. anurag kashyap ne creative sahas ka parichay diya hai. unhonne film ke naye shilp ke hisab se patakatha likhi hai. paro, dev aur chanda ke charitron ko sthapit karane ke bad ve interval ke pashchat rishton ki penchidagiyon men utarate hain. drshya, prasanga, bimb aur rang men navinata hai. filmankan ki prachalit shaili se alag jakar anurag ne naye prayog kiye hain. ye prayog film ke kathya aur uddeshya ke mel men hain. anurag ke shilp par samakalin videshi prabhav dikh sakata hai.
abhay deol svabhavik abhineta hain. unhonne dev ke jatil charitr ko sahajata se nibhaya hai. mushkil drshyon men unki abhivyakti, bhav mudrayen aur aangik kriyayen kiradar ke manobhav ko prabhavashali tarike se jahir karati hain. abhay apani pidhi ke nirbhik abhineta hain. mahi aur kalki men mahi ne apane kiradar ko samajha aur bakhoobi nibhaya hai. mahi ke abhinay men sadagi hai. kalki ko drshya achchhe mile hain, kintu vah charitra ki sanshlishtata ko chehre par nahin la patin. chunni ki bhoomika men dibyendu bhattacharya dhyan khinchate hain. is kiradar ko anavashyak tarike se simit kar diya gaya hai.
dev d ki visheshata iska sangit hai. film men git-sangit is khoobasoorati se piroya gaya hai ki pata hi nahin chalata ki film khatm hone tak ham atharah gane sun chuke hain. giton ka aisa filmankan rang de basanti ke bad dikha hai. amitabh bhattacharya, shaili aur amit trivedi ki tim ne madhur aur bhavapoorn sura, svar aur shabd rache hain.
Anurag Kashyap
Abhay Deol
Dibakar Banerjee
Hansal Mehta
Khalid Mohamed
Kundan Shah
Anish Kuruvilla
Jaideep Verma
Manish Gupta
Navdeep Singh
Bhavani Iyer
D. Santosh
Onir
Ashvin Kumar
Ramu Ramanathan
Sudhir Mishra
Pankaj Advani
Revathy
Saurabh Shukla
Shilpa Shukla
Sujoy Ghosh
Suparn Verma
Santosh Sivan
Shashank Ghosh
Shivajee
Pavan Kaul
Partho Sen-Gupta
Prroshant Naryannan
Sam Langoria
Satish Kasetty
Ajay jo bhi likha aapne is chal chitra ke baare mein, woh taarif ke kaabil hai.Isse Anurag aur anurag jaise anya nirdeshakon ke liye yeh ek acha tohfa ban gaya hai.aane wale dinon mein aur bahut aise filme aayenge jo thode ” hatke” honge aur ab Dev D ke safalta se unko darshakon ke saamne aane mein thodi aur aasani ho jaayegi!!!
aisa hona chahiye.creative sahas zaroori hai.mauke to milte hain,lekin jyadatar young director kaamyab hone ki koshish mein apni soch se samjhaute kar lete hain.
If Anurag Kashyap( or any body else) has answer for this? Will it be ever releasing in New Jersey? When the DVD will be out?? I have no way to watch this movie.
Ajay sir yeh shayad yeh har doosri workfield ki sachai hai.., log stability aur success ke chakkar main risk lene se darte hain.., ungli katne se pehle hi smoking band kar rahe hain…
yea man even i am waiting for the DVD. Not only in NJ and also in DALLAS. Man I am dying for this movie.
Ajay ji aapka lekh padh kar man praffulit ho gaya. Aapne es aadhunik or naveen chal chitra DEV D ka bahut hi haridya sparshiye ullekh kiya hai. Main aapke kathya se purnteh sehmat hun ki Chunni ji ka kirdar anavshyak hi simit kar diya hai. aapne bilkul satya kaha hai ki dev, paro or chanda jaise kirdaron ko hum sub jante hai lekin hum unke baare me charcha karna pasand nahi karte or agar karte bhi hai to kewal vyangya ke liye. Main to kehta hun ke hum sub ke ander ek DEV chhipa hai or jo insan kamzor hote hai unka DEV unke uper haavi ho jata hai. DEV D me Anurag Kashyap ne satya se parichay karwaya hai, lekin ek alag andaz se….
akash,
aapne sahi kaha.aur dev d ko sharat chandra ke devdas ke reference mein dekhne se dikkat hogi.jyadatar traditional soch ke critic naraz hain.unhen chahiye ki ve dev d ko swatantra film ke taur par dekhen.anurag ki creativi chalaki work kar gayi hai.man len dev d ka naam satyanarayan chaudhary alias satya c hota to film ke kirdaron ko establish karne mein hi ek chauthayi film nikal jati.
dev d hindi cinema ka naya aakhyan hai.