paudha mali ke saamne itraaye bhi to kaise-vishal bhardwaj
The language of the post is Non-English.. only the script is in english. sorry for them,who cant read and understand it.
for reading in hindi log on to…http://chavannichap.blogspot.com
Vishal Bharadwaj ne pichhale dinon poona me aayojit seminar men apani baten kahin. in baton me unaki eemanadari jhalakati hai. ve sahity aur sinema ke rishte aur film men natak ke roopantaran par apani filmon ke sandarbh men bol rahe the. ve poona film instityoot men aamantrit the.
jo chaahate ho so kahate ho, chup rahane ki lazzat kya jaano
ye raz-e-muhabbat hai pyaare, tum raz-e-muhabbat kya jaano
alfaz kahaan se laoon main chhale ki tapak samajhaane ko
ikraar-e-muhabbat karate ho, izhaar-e-muhabbat kya jaano
kahana nahin aata mujhe, bolana aata hai.
meri chup se galatafahamiyan kuchh aur bhi badhin
vo bhi suna usane, jo mainne kaha nahin
mujhe laga ki chup raha to bahut kuchh sun liya jayega. to ab jo kah raha hoon, usamen vah sun lijiye jo main nahin kah pa raha hoon.
sahitya se mera rishta kaise bana? main uski baten karoonga. un baton men koi mayane mil jaye, agar ye ho to munasib hoga. kal se main logon ko sun raha hoon . aisa lag raha hai ki kitna kam dekha hai, kitna kam suna hai aur kitana kam aata hai.
mali ke samane paudha itaraye bhi to kaise? (gulzar sahab ki taraf ishara). mere mali baithe huye hain. gulzar sahab ne to.. main dekh bhi nahin raha hoon unki taraf.
meri dharana hai ki aam darshak ausat kam ki pooja karate hain. main usi aam darshak ka hissa hoon. main usase alag nahin hoon.
maine sangit nirdeshak ke taur par career shuru kiya. “machis” ke bad mujhe seriously liya gaya “machis” se pahale main apani dhunen sunata tha to log kharidate nahin the. kuchh to karana tha. paise kamane ke liye maine jhooth bolana shuru kiya. main apni dhunen sunata tha aur kahata tha ki pakistan ki ek dhun se chori ki hai. fir vah dhun logon ko pasand aa jati thi. is tarah mera kam chalane laga tha. apane maulik kam ko chori kah ke bechana mujhe bahut achchha laga aur meri samajh men bhi aaya ki trade ke gur sikh lena zaroori hai. vahan se safar aarambh hua.
“machis” ke waqt mein gulzar sahab ne aise hi ek din tippani ki. unhonne kaha ek din tu filmamaker ban jaoge. maloom nahin unhonne mujh mein kya dekha hoga. lekin unaki baat mere achetan mein rah gayi. “machis” ke bad kuchh salon tak kam mila aur phir career khatm hona shuru ho gaya. mujhe laga ki ab kam milana band ho jayega. kuchh karana padega. mujhe laga ki filmen banana shuru karate hain. phir apani dhunen khud hi le loonga. is tarah khud ko rojagar deta rahoonga. yahi soch kar “Makadee” banayi. chhoti si maulik kahani thi. us samay anurag kashyap ne sujhav diya ki mujhe “Throne of Blood” dekhani chahiye. pahali bar maine kurosava ka nam suna. us film ki kahani aur flavour mere achetan men rah gaye.
“Makadee” ke baad mera mann tha ki underworld par film banaoon. sach kahoon to mujhe hinsa, golibari, bandook, bhagadaud ki kahaniyan achchhi lagati hain. tab socha ki ram gopal varma ne underworld ko is tarah nichod liya hai to main kya banaoon? gangaster films aam taur par gangavar mein khatm hoti hain. kis ne kis ko pahale mara, kis ko bad men mara. maut ke saath filmein khatm hoti hai. doosari taraf gulzar sahab ki “angoor” bhi dimag men thi. vah majedar film thi. apani bat karoon to sahitya se mera koi nata nahin tha. “Merchant of Venice” padhi thi. kisi tarah yad kar pas ho gaya tha. Shakespeare se mera utana hi vasta tha. “angoor” ki vajah se nata badha. sahitya ke sandarbh men kah raha hoon .. sahitya ka matalab hai kuchh serious log gahare men baithakar aisi baat karenge jo bahut hi boring hogi. sahitya ka yahi impression tha ki ismein pulp to hai hi nahin. pulp nahin hai to entertainment hoga nahin. mujhe laga hai ki aam darshak aaj bhi aise hi sochata hai. sahitya ka naam aate hi ve thoda pichhe hat jate hain ki entertainment to ismein nahin milane vala hai. log gahari aur serious baten karenge sahitya mein.
ek bar aalap (bala manjaganvakar ka beta) ke sath main deharadoon se delhi aa raha tha. main safar men bor ho raha tha. maine usase poochha ki koi kitab hai tumhare paas. usane mujhe “Shakespeare tales” di. usamein char-char page men shakespere ke natakon ki kahaniyan thin. maine us din “Macbeth” padhi. char page ki kahani thi. main underworld ki kahani khoj raha tha. mujhe laga ki “Macbeth” ki kahani itni natakiya hai. Itna drama hai. ye boring hai hi nahin jyada majedar kahani hai. Mumbai pahunchate hi maine woh play mangaya. mushkil hai shakesperean language ko samjhana. maine aisi kitab dhoondhi,jis men ek taraf shakesperean english thi aur ek taraf english language thi. phir main festival mein gaya to maine vo sab yad bhi kar liya tha ki javab dena padega to shakesperean language bol doonga. likhane laga to usi se check bhi karata raha ki bahut jyada galat to nahin ja raha. kahin aisa n ho ki main kuchh alag hi film bana loon aur kahata firoon ki “Macbeth” hai. mera agyan mere kam aa gaya. mujhe pata hi nahin tha ki main kis chij par haath rakh raha hoon. haath rakhana koi ignorant aadami hi kar sakata hai. kahana ki hamne “Macbeth” bana li. par vahan dost kam aaye bahut. gulzar sahab to the hi. nasir bhai, pankaj ji. nasir bhai ne jab us par stamp lagaya ki yah bahut achchhi script hai. tum bana lo ise. main koee sa bhi rol karoonga. cop ka poiint unako achchha laga. unhonne khud offer kiya – unhonne kaha ki main aur om cops ka rol karenge. tabhi “Macbeth” men character change kar diya. to ye ek nadani men ho gaya. thik-thak ho gaya. actors bhi bahut achchhe the aur script aisi hi thi, source usaka “Macbeth ” raha. maine usaki spirit ko kahin se barakarar rakha. us samay abbas tha mere satha. hamalogon ne usaki spirit ko pakadane ki koshish ki. hamalogon ne kaha ki iski spirit ko catch karane ki koshish karate hain. isake text ke pichhe nahin bhagenge. us vajah se shayad ek role likha huaa tha. ye bhi socha ki kar lete hain dekha jayega. maan lete hain ki ham hi Shakespeare they char sau sal pahale. usake bad recognition mila to himmat thodi badh gaee – bashir badr sahab ka sher -
“abhi apane isharon par hamen chalana nahin aaya
sadak ki lal pili battiyon ko kaun dekhega.”
cross karo, doosra signal bhi todo. himmat aa gaee. “omkara” mein thodi responsbility thi. lekin javed sahab ne pichhali bar kaha tha aur shayad sach kaha tha ki – “maqbool” mein maine Shakespeare ko fail kiya aur “omkara” mein Shakespeare ne mujhe fail kiya . pata nahin kaun kisaka exam le raha tha. par javed sahab ne mera exam zaroor liya hai yahan para. ab himmat ho gaee hai aur ab ye samajh men aaya ki ab main chah raha hoon original karane ki koshish karoon. mashahoor aur takatavar hone ka lobh chhod kar main filmen banaoon. mani kaul ne kal jo ek bat kahi. mujhe lagata hai ki main shayad us line ke liye pune aaya tha. structure aur texture. lekhak ke taur par main structure par itana dhyan deta raha. ab texture par dhyan doonga. act one,act two act three,begining, middle, end,plot,plot one,plot two…in sab mein lag-lag ke kahin texture par dhyan hi nahin de rahe the. agar mujhe structure par kam karana ho to likhoon na. texture ka jo khoobasoorat jumala main vapas lekar ja raha hoon. ab se main structure ke bajaye texture par kam karoonga. isi ke sath ab mujhe jana bhi hai. meri flight hai mujhe jana bhi hai. agar mere liye koi saval hai to gulzar sahab javab denge.
Tags: gulzar, maqbool, Omkara, shakespere, Vishal Bhardwaj
Anurag Kashyap
Abhay Deol
Dibakar Banerjee
Hansal Mehta
Khalid Mohamed
Kundan Shah
Anish Kuruvilla
Jaideep Verma
Manish Gupta
Navdeep Singh
Bhavani Iyer
D. Santosh
Onir
Ashvin Kumar
Ramu Ramanathan
Sudhir Mishra
Pankaj Advani
Revathy
Saurabh Shukla
Shilpa Shukla
Sujoy Ghosh
Suparn Verma
Santosh Sivan
Shashank Ghosh
Shivajee
Pavan Kaul
Partho Sen-Gupta
Prroshant Naryannan
Sam Langoria
Satish Kasetty
Ajayji, dhanyavaad! I also attended the seminar and was unable to capture some of the couplets that Vishal recited. But have managed to write down some points from that seminar like you here: http://quatrainman.blogspot.com/2009/03/how-to-ask-vishal-bhardwaj-question.html
Superb Writeup and Superb person! Hats Off to Vishal(And ofcourse Ajay for blogging it).
Vishal Bhardwaj is a humble genious!
Sir,
so much for your post about being sorry to people who will not understand, I’m afraid you haven’t written the hindostanee properly even in the english script…
I think you mean “Lazzat” when you say Lajjat, and I think you mean “Raaz-e-mohabbat” when you say “raj-ye-mohabbat” and “alfaz”, when you say “alfaj”!!!!
The beauty of poetry is destroyed when it is not said correctly…
nimisha,
i accept ur observation.no excuses…thats my limitation.i just wanted to bring vishal’s speech to pfc readers.
Nimisha (& Romans),
Lost in Transliteration…
I am sorry but failed to see your point.. specially when you are reading it in Roman… how does it matter whether the words are incorrect in some thing that is already non standard?.. Roman is only a work around for the people and you should not bother about such overlooking in transliteration…
The beauty is lost when the nukta is killed anyway whether in devnagri script or in this case roman (where there is very little scope for placing a nukta).. With Roman it is already a compromise on Beauty aspect… Since you are already compromising when reading in Roman, you should live with it and avoid nitpicking.. I am a big fan of Roman, but barring iTrans Project, no serious attempt has been made to standardize, so can live with it (probably not with Devnagri or Urdu Scripts)…
“paise kamane ke liye maine jhooth bolana shuru kiya. main apni dhunen sunata tha aur kahata tha ki pakistan ki ek dhun se chori ki hai. fir vah dhun logon ko pasand aa jati thi.”
This was a killer. You start feeling sorry for the world, unless you know that the orator of these words finally got his due..
pavan sahab,
main aapse ittefaq nahin rakhta…
aap aur hum shayad in scripts ki barikiyan jaante hon as to raj is raaz, lekin doosre bande ke liye to kahaani hi badal jaati hai jo especially urdu se zyaada qareeb se nawaqif ho!!i mean how can he get “lazzat” from “lajjat”!!
these languages are getting killed day in day out because of this only!!
aur aisa nahin hai, aap thoda sa dhyaan do to you can easily write all words in roman also!!
excellent post though!!the role of abbaji in maqbool was offered to naseer but he told vishal to pick a new face!!
aahmed saab,
main aapse ittefaq rakhata hoon, par aap hi bataaiye Roman me z aur j me nukta to aasaani se fit ho sakta hai par ka, ga, fa aur kha ke saath ke nukte pe to kahin na kahin compromise hoga hi?
aap bataaiye ki roman me ga aur nukete ke saath ga ko kaise likhenge? kya use gha likhenge? ya mujhe koi standard bataaiye Roman me likhne aur padhne ke liye?
Mera kahna bas itna hai ki Roman (jo standard nahin hai) me nukte ye uske sound ko use nahin karna (galati to hai par) itni badi galati nahin hai… haan agar original hindostani (Devnagri ya Urdu) script me ajay saab (or any other author) agar aisa karte hain, to ye point out karana zaroor jaayaz hai.. waise sahi maayne me mujhe is post me agar takleefdeh agar kuchh lagaa to wo ki transliteration me english ke words ko nahin baksha gaya aur “Macbeth” ko “mackbeth” likhna ya “Shakespeare” ko “shakespere”, aur “merchant of venice ” ko “marchent of venice” padhna waakai me takleefdeh tha.. English script me english words ko mere hisaab se as it is use kiya jaana chahiye..
>>these languages are getting killed day in day >>out because of this only!!
Jee, bilkul… jindagi
se nukte hi gaayab ho gaye hain aur iske muzrim hai.n akhbaar vaale.. aaj jo chhap rahaa hai uski script me itane compromises hai.n ki poochhiye mat..
Thanks Ajay ji for catering to the concerns of the readers..
bhasha bahut hi samvedansheel mudda hai.mujh se kuchh bhoolen hui thin aur phir takniki agyanta ke karan main unhen sudhar nahin pa raha tha.abhi sab theek hona chahiye…hindi filmon ke naam ashuddh padhne par ya trutipoorna samvaad sunne par bahut kasht hota hai.hindi films mein hindi par ek lekh yahan padh sakte hain…
http://chavannichap.blogspot.com/2009/03/blog-post_5967.html
ise padhen aur apne vichar post karen.
dhanyawad..jaldi hi anurag kashyap ki batein bhi post karoonga.
Sir jee, gr8 post…..mazaa aa gaya padh ke, as is d case wid aapke remaining posts.
Ajay ji agar aap kucch aur thoda prakash daal sake structure or texture pe toh mazaa aa jaayega….tho I understood in essence but still if u can write somethin more on dat (in layman’s terms) den it wld b gr8. Otherwise sir gud post.
PS: If somebody else here also like to discuss d texture and structure more den please do that.